Եղիշե Չարենցի տուն-թանգարանի հավաքածուն ընդգրկում է Ե. Չարենցի կյանքը, գրական ժառանգությունը և հասարակական-քաղաքական գործունեությունը ներկայացնող թանգարանային առարկաներ:
Թանգարանի առաքելությունն է ձեռք բերել նոր թանգարանային առարկաներ՝ համալրելով հավաքածուն, որի շնորհիվ իրականացվում է թանգարանի ողջ գործունեությունը:
Տարիներ շարունակ թանգարանային հավաքածուն համալրվել է գնման և նվիրատվությունների շնորհիվ: 60-ամյա թանգարանային առարկաների մեծ մասն իրենց պատմական, մշակութային և հասարակական նշանակությամբ բացառիկ են, իսկ մի մասը մասունքներ են` Չարենցի անձնական գրադարանը, ձեռագրերը, անձնական իրերը, արվեստի գործեր, լուսանկարներ, ինչպես նաև բանաստեղծի ընտանիքի անդամների արխիվները, իրերը, լուսանկարները և այլն:
Բանաստեղծի կյանքը և գործունեությունը մեկնաբանող հավաքչական աշխատանքներն իրականացվում են առ այսօր:
Այսօր, հատկապես, երբ ընթացքի մեջ է Եղիշե Չարենցի երկերի ժողովածուի ակադեմիական նոր հրատարակությունը, ցպահանջ է բանաստեղծի ձեռագրերի ամբողջացումը: Անհրաժեշտ է ձեռք բերել Ե. Չարենցի հատկապես վերջին շրջանի ստեղծագործությունների բնագրերն ու բնագրային տարբերությունները, պատառիկները, նամականին, Հայպետհրատում աշխատած տարիների պաշտոնական գրությունները:
Տուն-թանգարանի հիմնական ցուցադրության նոր հայեցակարգի կազմման աշխատանքներն իրականացնելու համար կարևոր է նաև մասնավոր հավաքածուներում առկա՝ բանաստեղծի անձնական իրերի, տվյալ ժամանակաշրջանի տպագիր, ընծայագրով գրքերի, լուսանկարների և կերպարվեստի առարկաների ձեռքբերումը:

ՀԱՅՏԱՐԱՐՈՒԹՅՈՒՆ
Եղիշե Չարենցի տուն-թանգարանը հայտարարում է թանգարանի ֆոնդերի համալրում։
Ընդունվում են բանաստեղծի, նրա ժամանակակիցների` Եղիշե Չարենցի հետ առնչություն ունեցող իրեր, լուսանկարներ, գրքեր, գրավոր նյութեր և վերոգրյալում նշված այլ առարկաներ։
Հայտերի ընդունման վերջնաժամկետը 2024 թվականի սեպտեմբերի 1-ն է։
Հայտերն անհրաժեշտ է ներկայացնել charents.museum@gmail.com էլեկտրոնային հասցեին: Հայտը ներկայացնող անձը պետք է ունենա տվյալ առարկայի փորձագիտական եզրակացությունը՝ համաձայն պետական գնման չափորոշիչների, լուսանկարը, առարկայի տվյալները, առարկան գնելու համար առաջարկվող արժեքը, առարկայի սեփականատիրոջ համաձայնությունը: Ներկայացված հայտերը կուսումնասիրվեն թանգարանի ֆոնդային գնահատող հանձնաժողովի կողմից առարկայի՝ թանգարանի ֆոնդի բնույթին համապատասխանությունը հաստատելու համար: Հանձնաժողովի կողմից հայտը հավանության արժանանալու կամ մերժման դեպքում թանգարանի կողմից հայտատուն կտեղեկացվի:
Հարցերի դեպքում կարող եք զանգահարել 010531412 հեռախոսահամարով։